Тус уулзалтад Оросын талаас Буриадын гаалийн газрын дарга Бурлака И.Ю, Хиагт боомтын дарга Татевосян В.В, Хиагт боомтын түр горимын асуудал хариуцсан гаалийн ахлах байцаагч Цаганова А.С нар, ОХУ-ын гаалийн байгууллагын төлөөлөгч Чагдуров А.В., Монголын талаас Сэлэнгэ аймаг дахь гаалийн газрын захиргааны албаны дарга М.Дамдинхорол, Гаалийн хяналт, шалгалтын албаны дарга Ч.Дөлгөөн, гаалийн улсын байцаагч Х.Монголжин нар тус тус оролцлоо.

Тус ажлын уулзалтаар 2024 оны эхний хагас жилийн байдлаар Алтанбулаг-Хиагт боомтын хилийн хөдөлгөөний мэдээ, хоёр улсын хилийн боомтууд дээр хийгдэж буй бүтээн байгуулалтын ажлын талаар мэдээллүүд, түүнчлэн ОХУ-ын Холбооны гаалийн алба болон Монгол Улсын Гаалийн ерөнхий газар хоорондын хэлэлцээр, протоколын хэрэгжилтийг хангах, боомтын хэт ачаалалтай үед хамтран ажиллах, хилээр нэвтэрч буй зорчигчдод хоёр орны хүчин төгөлдөр мөрдөгдөж буй хууль тогтоомжийг харилцан сурталчилж ажиллах зэрэг асуудлуудыг хэлэлцлээ.

Буриадын гаалийн газрын дарга Бурлака И.В. нь “Энэ оны эхний хагас жилийн байдлаар ОХУ-д зорчиж буй Монгол иргэдийн зөрчилд холбогдох байдал өмнөх оны мөн үетэй харьцуулахад багассан байгаад Сэлэнгэ аймаг дахь гаалийн газрын нийт албан хаагчдад талархаж буйгаа илэрхийлээд бидний хамтын ажиллагааны бодит үр дүн юм” хэмээн цохон тэмдэглэлээ.